Baş Prokurorluq: “91 nəfər həlak olub, 404-ü xəsarət alıb”
Azərbaycan Baş Prokurorluğu mülki əhalinin itki və ziyanları ilə bağlı növbəti açıqlama yayıb.
Məlumat cəbhədə döyüşlər başlanandan (sentyabrın 27-dən) bu gün, oktyabrın 31-i saat 13:00-dək dövrü əhatə edir.
Məlumata görə, Ermənistan silahlı qüvvələrinin yaşayış məntəqələrini ağır artilleriya qurğularından və raket sistemlərindən atəşə tutması nəticəsində Azərbaycan tərəfdən mülki şəxslərdən 91 nəfər həlak olub, 404 nəfər isə xəsarət alıb:
“ Bundan başqa, Ermənistan ordusunun intensiv ağır artilleriya və raket atəşi nəticəsində 2465 ev, 97 çoxmənzilli yaşayış binası, 455 mülki obyekt yararsız vəziyyətə düşüb.”
“Yaşayış məntəqələrimiz atəşə tutulur”
Ermənistan silahlı qüvvələrinin Tərtər şəhəri, rayonun Şıxarx qəsəbəsi, Əskipara kəndi və Ağcabədi rayonunun Qiyaməddinli kəndini artilleriya atəşinə tutduğu bildirilir.
Bu barədə oktyabrın 31-i, saat təqribən 16 radələrində Azərbaycan Müdafiə Nazirliyi ( AMN) məlumat yayıb.
Rusiyadan kömək istəyən Paşinyana cavab
Rusiya Xarici işlər Nazirliyi oktyabrın 31-dəki bəyanatında bildirir ki, iki ölkə arasında müqaviləyə görə, rəsmi Moskva Yerevana yalnız o halda lazım olan yardımı göstərəcək ki, hərbi toqquşmalar birbaşa Ermənistan ərazisində keçiriləcək.
Bu bəyanat Ermənistanın baş naziri Nikol Paşinyanın bir gün əvvəl Rusiya prezidenti Vladimir Putinə ünvanladığı müraciətinə cavab olaraq hazırlanıb.
Paşinyan sözügedən müraciətində Rusiyanın Ermənistanın təhlükəsizliyinin təminatı ilə bağlı mümkün yardıma dair məsləhətləşmələrin başlamasını xahiş etmişdi. Bu məsləhətləşmələr yardımın növünü və həcmini müəyyən etməli idi.
Rusiya Xarici İşlər Nazirliyi Ermənistan qarşısında öhdəliyini təsdiqləyib və bildirib ki, Rusiya və Ermənistan arasında 1997-ci il avqustun 29-da imzalanmış Dostluq Müqaviləsinə əsasən Ermənistan ərazisinə qarşı hücum və ya aqressiya olarsa, Rusiya bu ölkəyə yardım edəcək.
Bu müqavilənin bir sıra müddəaları tərəflərin ərazisinə qarşı silahlı hücum və ya aqressiya tətbiq olunacağı zaman konkret fəaliyyətləri nəzərdə tutur.
Bəyanat, həmçinin Ermənistan və Azərbaycanı oktyabrın 10-da Moskvada imzalanmış atəşkəs razılaşmasına əməl etməyə, baza prinsilər üzrə danışıqlar masasına qayıtmağa çağırır.
Tərəflər isə bir -birini atəşkəsi pozmaqda ittiham edir.
Ceyhun Bayramov BQXK baş direktoru ilə görüşüb
Cenevrəyə işçi səfəri çərçivəsində Azərbaycanın Xarici İşlər naziri Ceyhun Bayramovun Beynəlxalq Qızıl Xaç Komitəsinin (BQXK) baş direktoru Roberto Mardini ilə də görüşü keçirilib.
Bu barədə Azərbaycan Xarici İşlər Nazirliyi ( XİN) oktyabrın 31-i məlumat yayıb.
Məlumata görə, tərəflər Azərbaycan ilə BQXK arasında uzun illərdir ki, mövcud olan əməkdaşlığı məmnunluqla qeyd ediblər:
“Nazir Ceyhun Bayramov bölgədə mövcud olan son vəziyyətlə bağlı qarşı tərəfi məlumatlandırıb”
Açıqlamaya görə, O, vurğulayıb ki, Azərbaycanın cəbhə bölgəsindən uzaqda yerləşən şəhərləri, dinc əhalisi və mülki infrastrukturu bilərəkdən hədəfə alınır, qadağan olunmuş silahlardan mülki şəxslər atəşə tutulur.
C.Bayramovun Cenevrəyə işgüzar səfəri oktyabrın 30-da başlamışdı.O bundan əvvəl Cenevrədə ATƏT-in Minsk Qrupunun həmsədrləri və Ermənistanın Xarici İşlər naziri ilə görüşüb Dağlıq Qarabağ münaqişəsi ilə bağlı müzakirələr aparmışdı.