H.Hacıyev: "Hər iki yol Ermənistanın nəzarətindədir"
""Sərhədsiz reportyorlar" təşkilatının 80 nəfər yerli və xarici jurnalistin Xankəndidən təhlükəsiz çıxa bilməməsinə dair açıqlaması ilə əlaqədar bildiririk ki, Laçın dəhlizi vasitəsilə Xankəndi ilə Ermənistan arasında yolu bağlayan məhz Ermənistandır".
Bunu Azərbaycan prezidentin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev kütləvi informasiya vasitələrinə açıqlamasında bildirib.
O əlavə edib ki, dünən (noyabrın 4-ü) Ermənistan tərəfi açıqlama verərək yolu bağladığını bildirib.
Prezidentin köməkçisi deyib ki, ümumiyyətlə, Xankəndidən Ermənistana iki yol var: "Biri Azərbaycanın işğal olunmuş Kəlbəcər rayonu ərazisindən keçərək Ermənistanın Vardenis rayonuna doğru gedir. Digər yol isə Laçın dəhlizi vasitəsi ilədir. Bu günə (noyabrın 5-nə) olan məlumata görə, hər iki yol Ermənistan silahlı qüvvələrinin nəzarətindədir".
Dilgəm Əsgərov və Şahbaz Quliyevi Ermənistana aparıblar
Dağlıq Qarabağ münaqişəsi nəticəsində saxlanan bəzi şəxslərin Ermənistana köçürülməsi ilə bağlı Beynəlxalq Qırmızı Xaç Komitəsinin Bakı ofisinə məlumat verilib.
Bu barədə "Turan" agentliyinə Qırmızı Xaç Komitəsinin Bakı ofisinin ictimaiyyətlə əlaqələr departamentinin rəhbəri İlahə Hüseynova deyib.
İ.Hüseynovanın sözlərinə görə, Ermənistana köçürülmüş şəxslərin arasında Dilgəm Əsgərov və Şahbaz Quliyev də var.
D.Əsgərov ilə Ş.Quliyev 2014-cü ildə Azərbaycanın işğal altında olan Kəlbəcər rayonu ərazisində saxlanıblar. Müdafiə tərəfi onların Kəlbəcərə yaxınlarının məzarlarını yad etmək üçün getdiklərini bildirir. Tanınmayan "Dağlıq Qarabağ Respublikası"nda isə onlar qətl və digər ağır cinayətlər törətməkdə ittiham ediliblər.
Xankəndində məhkəmə D.Əsgərovu ömürlük, Ş.Quliyevi isə 22 il azadlıqdan məhrum edib. Amma Azərbaycan həmin məhkəməni tanımır, onu separatçı qurumun qanunsuz orqanı sayır. Azərbaycan rəsmiləri hesab edirlər ki, ölkə vətəndaşlarının bu şəkildə mühakiməsi qanunsuzdur.
MN: Tərtər və Ağdamın kəndləri atəşə tutulur
"Noyabrın 5-i saat 14:40-dan başlayaraq Ermənistan silahlı qüvvələrinin bölmələri Tərtər şəhəri, rayonun Səhləabad kəndini, eləcə də Ağdam rayonunun Hacıturallı və Əfətli kəndlərini artilleriya atəşinə tutur".
Bu məlumatı Azərbaycan Müdafiə Nazirliyi (AMN) yayıb.
Açıqlamaya görə, Azərbaycan ordusunun bölmələri də buna qarşı cavab tədbirləri görür.