Fasilədir
Məhkəmə işçiləri AzadlıqRadiosunun əməkdaşına fasilə elan olunduğunu söyləyiblər. Amma səbəbini bildirməyiblər.
Şahidlərin dindirilməsi davam edir
Avqustun 12-də Bakı Ağır Cinayətlər Məhkəməsində araşdırmaçı-jurnalist Xədicə İsmayılın məhkəməsi davam edir.
Jurnalistin ailə üzvləri və səfirliklərin əməkdaşları içəridədirlər.
Bu gün məhkəmə şahidlərin dindirilməsi ilə davam etdirilməlidir.
Xədicə gətirilməyib
Xədicə İsmayıl Ali Məhkəməyə gətirilməyib və onun hüquqlarını müdafiə edən Yalçın İmanov buna etiraz edib.
Elman Türkoğlu da nümayəndəsi gəlmədiyi üçün məhkəmənin təxirə salınmasını istəyib.
Məhkəmə avqustun 26-da saat 11-də davam edəcək.
Xədicə İsmayılın vəkilləri işin istintaqla aparılmasını tələb edirlər.
Ali Məhkəmədə Xədicənin şikayətinə baxılır
Avqustun 12-də Ali Məhkəmədə araşdırmaçı-jurnalist Xədicə İsmayılın şikayətinə baxılır.
Bu ilin fevralında məhkəmənin qərarı ilə jurnalist 2500 manat cərimələnib. Buna səbəb Elman Türkoğlunun Xədicə İsmayılı onun haqqında iki sənəd yaymaqda günahlandırmasıdır. Bu sənədlərin birində Elman Türkoğlunun gizli videogörüntülərlə şantaj olunaraq MTN-lə əməkdaşlığa cəlb edildiyi, digərində isə 1992-ci ildə zorlama cinayəti törətdiyi iddia olunur. Xədicə İsmayıl ikinci sənədi yaymadığını, birinci sənədi isə Elman Türkoğlunun adını və onun şəxsiyyətini müəyyənləşdirə biləcək məlumatları sildikdən sonra yaydığını bildirib.
Məhkəmənin qərarından narazı qalan jurnalist şikayət verib.
Məhkəmədən öncə Elman Türkoğlu AzadlıqRadiosuna deyib ki, Xədicə İsmayıl sənədləri ona təqdim edənin kimliyini açıqlasa, şikayətini geri götürəcək.
Xədicə İsmayıl ötən il dekabrın 5-də başqasını özünüöldürmə həddinə çatdırma ittihamı ilə həbs edilib. Fevralın 13-də isə ona qarşı mənimsəmə və vergidən yayınma kimi ittihamlar irəli sürülüb.
Xədicə İsmayıl həbsinin jurnalistlik fəaliyyəti ilə bağlı olduğunu deyir. AzadlıqRadiosunun rəhbərliyi bəyan edib ki, Xədicə İsmayılın həbsi onun ölkə məmurlarının gizli biznesi haqda araşdırmalarına görə hakimiyyətin qisasıdır.