Xəbərlər
İranlı nazir Azərbaycanla münasibətlərdən danışıb
Ekspertlər hesab edir ki, İran-Azərbaycan münasibətlərinin normallaşmasının bir neçə şərtləri var.
İyulun 5-də Bakıda səfərdə olan İranın xarici işlər naziri Hüseyn Əmir Abdullahiyan Azərbaycan səfirliyinə qarşı törədilmiş terror aktının İranın məhkəmə və hüquq-mühafizə orqanları tərəfindən çox ciddi şəkildə araşdırıldığını bildirdi və Azərbaycanın Tehrandakı səfirliyinin fəaliyyətinin tezliklə bərpa olunacağına ümidvarlığını ifadə etdi.
Son illər İran-Azərbaycan münasibətləri gərgindir. Münasibətlərin xüsusi gərgin fazası bu ilin yanvarın 27-də Azərbaycanın Tehrandakı səfirliyinə hücumundan sonra başlayıb.
Ekspertlər hesab edir ki, İran-Azərbaycan münasibətlərinin normallaşmasının bir neçə şərtləri var.
Milli Məclisin Müdafiə, təhlükəsizlik və korrupsiyaya qarşı mübarizə komitəsinin sədr müavini Hikmət Babaoğlu Turana bildirib ki, İranın xarici işlər naziri Azərbaycanın səfirliyinə hücum edən şəxsin cəzalandırılmasından qəti danışmadı: “O öz tvitter hesabında bildirdi ki, əgər belə bir şey varsa, tapılacaq. Yəni qeyri-dəqiq və şərti cümlələri qurdu. Ona görə də Azərbaycana gəlməmişdən əvvəl onun tvitterdə yazdığı fikirlər riyakarlıqdan başqa bir şey deyil. Çünki görüş zamanı o Azərbaycan Prezidentindən xahiş etdi ki, Azərbaycanın Tehrandakı səfirliyi işini bərpa etsin, Azərbaycan Prezidenti isə dedi ki, biz terrorçuların cəzalandırılacağına ümid edirik. Ancaq İranın xarici işlər naziri həmin terrorçuların cəzalandırılması barədə heç nə deməyib”.
Deputat qeyd edib ki, başqa bir tərəfdən Azərbaycana gəlməmişdən bir neçə gün qabaq Şimal-Cənub dəhlizinin Azərbaycan üzərindən deyil, Türkmənistan və Xorasan üzərindən çəkilməsi barədə müzakirələr aparılıb: “Belə olan halda biz İranın riyakar siyasətini 30 ildir tanıyırıq, bu gün də bu siyasət davam edir. Hesab efirəm ki, İranın xarici işlər naziri öz sözlərində səmimi deyildi”.
Siyasi Menecment İnstitutunun rəhbəri Azər Qasımlı isə AzadlıqRadiosuna bildirib ki, münasibətlərin yaxşı olması həm Azərbaycana, həm İrana lazımdır: “İran istəmir ki, bu bölgədə İsrail güclü olsun, Azərbaycanda İsrailin güc potensialı olsun. Həmçinin İran sanksiyalar altındadır, ciddi iqtisadi problemləri var. Bu baxımından İran əlavə başağrısı və regionda əlavə düşmənin olmasını istəmir”.
Ekspertin fikrincə, Azərbaycanla İran arasında bir neçə problem var: “Biri Zəngəzur projesidir. İlham Əliyevin Zəngəzur ritorikası, keçən ilin sentyabrında Ermənistan-Azərbaycan sərhədində atəşkəsin pozulması İranı narahat edir. İranın istəyi odur ki, onunla Ermənistan arasında olan sərhəd dəyişməsin və orada hər hansı bir dəhliz olmasın. İkinci məqam isə İsraillə Azərbaycanın arasında ilk növbədə hərbi sahədə münasibətlərin daha da dərinləşməsidir. Bu, İran üçün narahatedici faktordur”.
Onun fikrincə, Azərbaycan üçün isə narahatedici faktor o idi ki, İranın birbaşa Qarabağ erməniləri ilə bir kommunikasiyası var idi, İrandan Ermənistan vasitəsilə Qarabağa silah göndərilirdi:
“İndi bunun qarşısı alındı, Laçında nəzarət-buraxılış məntəqəsi quruldu. Azərbaycanın digər istəyi də odur ki, İran Zəngəzur dəhliz ( Ermənistanın Sünük bölgəsindən keçəcəyi gözlənən ) məsələsinə müdaxilə və Ermənistana bu mənada təzyiq etməsin. Digər problem İranın Azərbaycanda dini şəbəkəsinin qurmasıdır. Azərbaycanın istəyi odur ki, İran bu şəbəkələri yaratmasın, dini ekspansiyadan əl çəksin”.
A.Qasımlının sözlərinə görə, kəskin ritorikasına baxmayaraq, Azərbaycan İranla münasibətlərini heç vaxt tam kəsməyib. “İran tərəfi də bunu gözəl başa düşür. Azərbaycan elitasının və İran rejimin maraqları bir çox məqamlarda üst-üstə düşür və iki ölkə arasında ciddi gərginliyin olmasını zənn etmirəm”.
Yazida səslənən tənqidi fikirlərə, İranın Azərbaycandakı Səfirliyindən münasibət almaq mümkün olmayıb.
Xatırlatma
Yanvarın 27-dəAzərbaycanın Tehrandakı səfirliyinə silahlı hücum olub. Hücum edən şəxs səfirlik əməkdaşlara atəş açıb. Hücum nəticəsində diplomatik nümayəndəliyin mühafizə xidmətinin rəhbəri Orxan Əsgərov həlak olub, iki mühafizəçi isə yaralanıb. Daha sonra Azərbaycan səfirliyinin əməkdaşları Tehrandan evakuasiya edilib, səfirliyin fəaliyyəti dayandırılıb.
Azərbaycan bu hücumu "terror aktı" adlandırıb. XİN isə vətəndaşları İrana səfərdən çəkinməyə çağırıb. İran səfirliyə silahlı hücumun araşdırılacağını bəyan edib.
Bütün xəbərləri izləyin
Hərbi Xidmətə Çağırış üzrə Dövlət Xidmətində bölmə rəisi həbs edilib
Səfərbərlik və Hərbi Xidmətə Çağırış üzrə Dövlət Xidmətinin Daşkəsən rayon bölməsinin rəisi vəzifəsini icra edən, mayor Anar Əsgərov həbs edilib.
AZƏRTAC Hərbi Prokurorluğun mətbuat xidmətinə istinadən xəbər verib ki, onun barəsində Cinayət Məcəlləsinin 311.3.2-ci (təkrar rüşvət alma) maddəsi ilə ittiham elan edilib, Bakı Hərbi Məhkəməsinin qərarı ilə barəsində dörd aylıq həbs qətimkan tədbiri seçilib.
Amma, hələlik, ittihama Anar Əsgərov və ya vəkilindən münasibət almaq mümkün olmayıb.
Həmin maddə üzrə şəxsə 12 ilə qədər həbs cəzası verilə bilər.
Mətbuat xidmətindən habelə bildirilib ki, Hərbi Prokurorluğun İstintaq idarəsində cinayət işi üzrə müvafiq əməlləri törətməsinə şübhələr olan həmin Xidmətin Şuşa şəhər şöbəsinin sabiq rəisi, polkovnik Seymur Qurbanov barəsində də 4 aylıq həbs qəti imkan tədbiri seçilib. O, isə Cinayət Məcəlləsinin 178.2.2-ci (təkrar törədilməklə dələduzluq), 311.3.2-ci və digər maddələr ilə ittiham olunur.
Amma bu ittihamlara da, hələlik, Seymur Qurbanov və yaxınlarının münasibəti bəlli deyil.
Xatırlatma
Ötən il Xidmətin Xəzər, Xaçmaz, Cəlilabad və Laçın rayon şöbələrinin vəzifəli şəxsləri də oxşar ittihamlarla üzləşmişdilər. Onlar isə əsasən ittihamları qəbul etmirdilər.
Azərbaycanda hər il dörd dəfə - yanvar, aprel, iyul və oktyabrda müddətli həqiqi hərbi xidmətə çağırış gerçəkləşdirilir və minlərlə gənc hərbi xidmətə cəlb olunur.
Naomi Kempbell beş illiyə xeyriyyə işindən kənarlaşdırılıb
Model Naomi Kempbellin (Naomi Campbell) 5 il ərzində xeyriyyə qəyyumu olması yasaqlanıb. Səbəb onun yaratdığı xeyriyyə qurumunda maliyyə pozuntularının aşkarlanmasıdır. Bu haqda "The Guardian" qəzeti yazır.
Böyük Britaniyanın Xeyriyyə Komissiyası aşkar edib ki, Kempbellin "Fashion for Relief" xeyriyyə təşkilatı moda tədbirlərindən yığdığı milyonlarla funt-sterlinqin cüzi hissəsini bu məqsədlə xərcləyib.
Xeyriyyə təşkilatının on minlərlə funt-sterlinqi Kempbell üçün dəbdəbəli otel nömrələrinə, uçuşlara, spa müalicələrinə, şəxsi təhlükəsizlik və siqaretə xərclədiyi aşkarlanıb. Məlumata görə, Kempbellin qurumundan daha bir qəyyuma isə yüz minlərlə funt-sterlinq məbləğində qanunsuz konsultasiya ödənişləri olunub.
2016-cı ildən başlayaraq beş il ərzində "Fashion for Relief" müxtəlif dəb şoularından 4.8 milyon funt-sterlinq vəsait yığıb. Bunun yalnız 389 mini tərəfdaş xeyriyyə təşkilatlarına ödənib.
350 min funt-sterlinq geri alınaraq paylanıb
Komissiyanın təyin etdiyi aralıq menecerləri xeyriyyə qurumundan 350 min funt-sterlinqə qədər vəsaiti geri alaraq "Save the Children", "Mayor's Fund for London" kimi təşkilatlara ödəyə biliblər. Məhz bu təşkilatlar dörd il öncə onlara vəd olunan ödənişləri ala bilməyəndə dövlət orqanlarına şikayət etmişdilər.
Kempbellin qəyyum həmkarı Byanka Hellmiç (Bianka Hellmich) isə 9 il müddətinə bu işdən kənarlaşdırılıb. Ona qanunsuz konsultasiya ödənişi kimi 290 min, bir ildə səyahət xərcləri formasında isə 26 min funt-sterlinq ödəniş olunub.
Hellmiç 2022-ci ilin fevralında komissiyaya həmin məbləği qaytarmağı təklif edib və 2023-cü ilin aprelində məbləğ bütünlükdə ödənib.
"The Guardian" yazır ki, "Fashion for Relief" daha öncə yalnız fandreyzinq xeyriyyə qurumu olduğunu bildirib.
2018-ci ilin mayında Kannda bir tədbirə keçmiş qəyyumun və donorun aparılması üçün uçuş quruma 14 min 800 funt-sterlinqə başa gəlib. Kempbell orada gecəsi 3 min funt-sterlinqə nömrədə qalıb, təhlükəsizlik xərcləri 4 min funt-sterlinqi ötüb.
Qəzet Kempbell və Hellmiçə şərh üçün müraciət etdiyini yazır.
Özbəkistanda məktəbdə rus dili qalmaqalı
Özbəkistanda məktəbdə müəllimlə altıncı sinif şagirdi arasında insident Rusiya və Özbəkistan rəsmiləri arasında qarşılıqlı bəyanatlara səbəb olub.
İnsident sentyabrın 23-də Daşkənddə bir məktəbdə baş verib. Rus dili sinfində qadın müəllim şagirdin qulağını dartıb, ona şillə vurub. Buna şagirdin müəllimdən niyə rusca danışmadığını soruşması səbəb olub.
İnsidentin videosu internetdə sürətlə yayılıb, sosial mediada rusların kəskin reaksiyasını doğurub.
Rusiya XİN-in mövqeyi
Sentyabrın 25-də Xarici İşlər Nazirliyinin sözçüsü Mariya Zaxarova müsahibəsində deyib ki, Rusiya insidentlə bağlı Özbəkistan tərəfdən rəsmi izahat istəyib.
"Mediada yayılmış materiala hüquqi qiymət vermək üçün Özbəkistana təcili müraciət göndərilib, insident sübut olunarsa, uşağa qarşı qəddarlıq edən şəxsə qarşı tədbirlər görülməlidir", – Zaxarova söyləyib.
Özbəkistan parlamentinin sədr müavini, Milli Dirçəliş Demokratik Partiyasının lideri Alişer Qodirov sentyabrın 26-da Telegram-da yazıb ki, "Rusiya yaxşı olar, özünün problemlərlə dolu işlərini həll etsin, bizim daxili məsələlərimizə qarışmasın".
"Özbəkistanlı uşağın Özbəkistanda məktəbdə hüquqlarının pozulması ölkə qanunlarına uyğun araşdırılacaq. Heç nədən hay-küy yaratmağın mənası yoxdur", – Qodirov yazıb.
Əhalinin cəmi 2 faizi etnik ruslardır
Özbəkistanın 35 milyonluq əhalisinin yalnız 2 faizə yaxını etnik ruslardır. Ancaq ölkə məktəblərində rus dili ayrıca keçilir.
Rusiya 2022-ci ildə Ukraynaya qarşı tammiqyaslı işğala başlayandan Özbəkistan və digər postsovet respublikaları ölkələrində rus dilinin tədrisinə ehtiyatla yanaşmağa başlayıblar.
Moskva təcavüzünü həm də "Ukraynanın rusdilli əhalisini nasist hökumətdən qorumaq" ilə əsaslandırırdı. Ukrayna hökuməti demokratik yolla seçilib, ifrat sağçı partiyalar ora daxil deyil.
Sentyabrın əvvəlində Qodirov təklif edib ki, ölkədə bütün sovet simvolları və ideologiyası yasaqlansın. Buna Səmərqənd şəhərində məhkəmənin bir yerli sakinə şərti cəza kəsməsi səbəb olub. Həmin şəxs Sovet İttifaqının bərpasına çağıran Rusiya qrupu ilə işləməkdə təqsirli bilinib.
Pakistan Azərbaycana JF-17 qırıcıları satmaq üçün kontrakt imzalayıb
Pakistan ordusunun sentyabrın 26-da bildirdiyinə görə, Azərbaycana "JF-17 Block III" qırıcı təyyarələrinin satışı üzrə kontrakt imzalanıb.
Təyyarəni Pakistan Aeronavtika Kompleksi ilə Çin birlikdə hazırlayır. Son illər İslamabadla Pekinin hərbi münasibətləri sıxlaşıb, Birləşmiş Ştatlar ilə zəifləyib.
Azərbaycana neçə qırıcının, hansı qiymətə satılacağı açıqlanmayıb. Bəyanatda deyilir ki, İslamabad dost ölkələrlə müdafiə sahəsində əməkdaşlığı gücləndirməyə, Azərbaycanın hava gücünü artırmağa çalışır.
Həm də Türkiyənin müttəfiqi olan Pakistan Azərbaycanı 2020-ci il Qarabağ müharibəsində dəstəkləyib. Azərbaycan həmin 44 günlük müharibə və 2023-cü ildə birgünlük hərbi əməliyyatla ərazi bütövlüyünü bərpa edib. Ermənistanla sülh sazişi imzalanmayıb, sərhədlər delimitasiya olunmayıb.
Azərbaycan prezidenti İlham Əliyev iyulda Pakistana səfər edib. Tərəflər müdafiə də daxil olmaqla bir sıra sahələrdə əməkdaşlığı genişləndirmək üzrə razılığa gəliblər.
Pakistan Bakıda keçirilən müdafiə sərgisində iştirak üçün hava qüvvələri kontingenti göndərib, bu təyyarə nümayiş olunub.
Aİ İsrail və Livanı 'dözülməz' vəziyyətə son qoymaq üçün atəşkəs imzalamağa çağırır
Sentyabrın 26-da Avropa İttifaqı (Aİ) İsraili və İranın dəstəklədiyi, ABŞ-nin terrorçu təşkilat saydığı "Hizbullah" qruplaşmasını "diplomatiyaya yer ayırmaqdan ötrü" dərhal 21 günlük atəşkəs elan etməyə çağırıb. Livan-İsrail sərhədində intensiv hava zərbələri quru işğalı sarıdan qorxuları gücləndirib.
"2023-cü il oktyabrın 8-dən bəri Livanla İsrail arasında vəziyyət dözülməzdir, daha geniş regional eskalasiya kimi qəbuledilməz risk yaradır", – 27 üzvdən ibarət blok sentyabrın 26-da bəyanatda bildirib.
"Bu heç kəsin, nə İsrail, nə də Livan xalqının marağındadır. Sərhədin hər iki tərəfində yaşayan dinc sakinlərin evlərinə təhlükəsiz qayıtmasından ötrü diplomatik həllin vaxtı çatıb", – bəyanatda vurğulanır.
Sentyabrın 25-də Nyu-Yorkda BMT Baş Assambleyası çərçivəsində ABŞ, Fransa və bir neçə başqa müttəfiq 21 günlük atəşkəsə dəstək yığmaqdan ötrü diplomatik dəhlizlərdə işləyiblər. İsrailin İranın dəstəklədiyi, ABŞ və Aİ-nin terrorçu saydığı HƏMAS qruplaşması ilə savaşdığı Qəzza zolağında da döyüşlərə fasilə verilməsi istənilir.
Atəşkəs planı
Diplomatlar deyirlər ki, atəşkəs İsrail və Livan arasındakı "Mavi xətt" adlı demarkasiya xəttində tətbiq ediləcək, tərəflərə imkan verəcək ki, münaqişənin potensial diplomatik həlli üçün danışıqlar aparsınlar.
"Bütün tərəfləri, o cümlədən İsrail və Livan hökumətlərini dərhal müvəqqəti atəşkəs elan etməyə... diplomatik həllə real şans verməyə çağırırıq", – Aİ bildirib.
"Bunun ardınca bu müddət ərzində Livanla İsrail arasında razılaşma əldə etmək üçün bütün diplomatik səylərə tam dəstək verməyə..., bu münaqişəyə birdəfəlik son qoymağa hazırıq", – bəyanatda daha sonra vurğulanır.
Ancaq diplomatik səylərə rəğmən, İsrail ötən gecə Bekaa vadisində "Hizbullah"ın 75 hədəfini vurduğunu bildirib. İsrail deyir ki, şimal sərhədinin təhlükəsizliyini, on minlərlə sakinin evinə qayıtmasını təmin etməyə çalışır. Həmin sakinlər "Hizbullah" ilə İsrail arasında davamlı raket atəşi nəticəsində evlərini tərk etməli olublar.
"Reuters" Livanın Yunin şəhərinin merinə istinadla yazır ki, zərbələrdən biri azı 23 suriyalının həyatına son qoyub, onların çoxu qadınlar və uşaqlar olub. Zərbə üçmərtəbəli binanı hədəfə alıbmış.
Nyu-Yorkun merinə qarşı cinayət ittihamları irəli sürülüb
Nyu-Yorkun meri Erik Adamsa (Eric Adams) qarşı cinayət ittihamları irəli sürülüb. Bu barədə "The New York Times" mənbələrə istinadla yazır. Şəhərin tarixində ilk dəfə olaraq vəzifədə olan mer cinayət törətməkdə ittiham edilir.
İttihamlar rəsmən elan edilməyib. Amma Nyu-York prokurorluğu bir ildir ki, merin bəzi müşavirləri və köməkçiləri, o cümlədən onun təhlükəsizlik məsələləri üzrə müavini ilə bağlı təhqiqat aparır. Bu yaxınlarda Nyu-York polisinin rəisi, Nyu-Yorkda məktəblər üzrə idarəçi vəzifələrindən istefa veriblər.
Seçki kampaniyasının maliyyə mənbələri araşdırılır
Şəhər mediasının yazdığına görə, federal prokurorluq Adamsın seçki kampaniyasının maliyyə mənbələrini araşdırır. O, 2021-ci ildə Nyu-Yorkun meri vəzifəsinə namizədliyini verib.
Prokurorlar ötən ilin payızından bəri Adams ilə maraqlanmağa başlayıblar. FTB agentləri onu bir ictimai tədbirdən sonra saxlayaraq smartfon və planşetini müsadirə ediblər.
Adams Nyu-Yorkun tarixində ikinci qaradərili merdir. O, daha öncə polis kapitanı olub, cinayətkarlığın azaldılması, ABŞ-nin ən böyük şəhərinin idarə olunmasında peşəkarlığın artırılması devizi ilə kampaniyalar aparıb.
Adams sentyabrın 25-də axşam yaydığı videomüraciətdə deyib ki, ona qarşı istənilən ittihamlar "tamamilə yalandır". Dediyinə görə, federal prokurorların diqqətini ona görə çəkib ki, "nyu-yorkluları müdafiə edib". Adams istefaya getməyəcəyinin anonsunu verib.
"The Associated Press" yazır ki, merə qarşı ittihamlar sentyabrın 26-da açıqlana bilər.
Tramp deyir ki, Zelenski müharibəni bitirəcək saziş razılaşdırmaqdan imtina edir və milyardlar alır
ABŞ-də prezidentliyə respublikaçıların namizədi Donald Tramp (Donald Trump) sentyabrın 25-də deyib ki, Ukrayna prezidenti Volodimir Zelenski Birləşmiş Ştatlardan milyardlar alır və Rusiyanın tammiqyaslı işğalını bitirəcək saziş razılaşdırmaqdan imtina edir. Tramp Vaşinqtonun Kiyevə ayırdığı yardımını tənqid edir. Onun mövqeyincə, Rusiya 2022-ci ilin fevralında hücuma başlamazdan öncə Ukrayna Rusiya prezidenti Vladimir Putinə güzəştə getməliydi.
"İstənilən saziş – hətta ən pis saziş belə indi baş verənlərdən daha yaxşı olardı. Pis saziş əldə etsəydilər belə, daha yaxşı olardı. Azacıq güzəştə gedərdilər və hər kəs sağ qalardı, binalar tikilərdi, qüllələr daha 2 min il salamat qalardı", – Tramp vurğulayıb.
Tramp bunları Şimali Karolinada seçki mitinqində deyib. Zelenski isə həmin vaxt Nyu-Yorkda BMT Baş Assambleyasında iştirak edirdi.
Trampın öncəki iddiaları
ABŞ-nin keçmiş prezidenti Tramp əvvəllər də bir neçə dəfə iddia edib ki, o, ölkə başçısı olsaydı, Rusiya heç vaxt Ukraynanı işğal etməzdi, Ağ evə qayıdarsa, müharibəyə tezliklə son qoyacaq. Ancaq bunu necə edəcəyini konkret izah etməyib.
Bu ayın əvvəlində demokratların namizədi Kamala Harris ilə debatda Tramp Ukraynanın müharibəni udmasını istəyib-istəmədiyini deməkdən imtina edib.
2022-ci ilin fevralında işğal başlamazdan öncə Rusiya və Ukrayna arasında bir neçə dəfə danışıqlar keçirilib. Ancaq Kiyev Moskvanın tələblərini rədd edib. Tələblərə Rusiyanın Krım vilayətini qanunsuz ilhaqının, separatçıların nəzarətində olan Luqansk və Donetskin tanınması daxil idi.
Tramp görünür, Zelenskinin "The New Yorker"ə müsahibəsinə cavab verib. Zelenski deyib ki, "Tramp müharibəni necə dayandırmağı gerçəkdən bilmir, hətta bildiyini düşünsə belə".
Zelenski Nyu-Yorkda Baydenə "qələbə planı"nı təqdim edəcəyini bildirib. Plana ABŞ-nin verdiyi uzaqvuran silahlarla Rusiyada hədəflərin vurulmasına icazə üçün xahişin də salındığı deyilir.
Nyu-Yorkda Trampla Zelenskinin də üzbəüz görüşəcəyi barədə xəbərlər vardı, ancaq ABŞ mediası bu görüşün təxirə salındığını yazıb.
Birgə dəstək bəyannaməsi
Ağ evin məlumatına görə, Bayden Ukraynanın bərpası və yenidən qurulması üçün birgə dəstək bəyannaməsi açıqlayıb. Təşəbbüsə azı 30 ölkə, o cümlədən "Böyük yeddilik" üzvləri, Aİ də daxildir.
Bayden, Zelenski və Avropa Komissiyasının prezidenti Ursula Fon der Lyayen Nyu-Yorkda bir araya gələrək Ukraynaya güclü dəstək nümayiş etdiriblər.
Ağ evin yaydığı sənəddə deyilir ki, Rusiya Ukraynada törətdiyi dağıntılardan ötrü kompensasiya ödəmək üçün beynəlxalq hüquq çərçivəsində məsuliyyət daşıyır.
ABŞ Müdafiə Nazirliyi isə sentyabrın 25-də Vaşinqtonun Ukraynaya 375 milyon dollarlıq əlavə hərbi yardım ayıracağını bildirib. Paketə HIMARS sistemləri, minaya davamlı zirehli texnika, eləcə də tank əleyhinə "Javelin" raket kompleksləri və TOW idarəolunun raketlər daxildir.
Bu il 12 mindən çox etnik qazax vətənə repatriasiya edilib
2024-cü ildə 12 min 325 etnik qazax Qazaxıstana repatriasiya edilib və qandas (qandaş) statusu alıb.
Bu məlumatı Qazaxıstan Əmək və Sosial Müdafiə Nazirliyinin mətbuat xidməti yayıb.
Xəbərdə deyilir ki, əvvəllər belə qazaxları oralman adlandırırdılar, lakin 2020-ci ildən onların rəsmi statusu qandasdır. Qandas başqa dillərə qandaş, soydaş kimi tərcümə oluna bilər.
Qandaslar Qazaxıstanda oturum hüququnu sadələşdirilmiş prosedurla almaq hüququna malikdirlər.
Belə ki, onlar Qazaxıstana köçdükləri andan vətəndaşlıq üçün ərizə verə bilərlər.
Bu da xəbər verilir ki, bu ilin əvvəlindən Qazaxıstana gəlmiş qandasların 45,6 faizi Çindən, 39.2 faizi Özbəkistandan, 5.5 faizi Türkmənistandan, 5.4 faizi Monqolustandan, 3.1 faizi Rusiyadan və başqa ölkələrdən köçüb.
1 milyondan çox
Hakimiyyət bir qayda olaraq onları işçi qüvvəsinin çatışmadığı regionlarda - Akmola, Abay, Kustanay, Pavlodar, Şərqi və Şimali Qazaxıstan vilayətlərində yerləşdirir.
Tarixi vətənə qayıtmış şəxslərin 58.2 faizi əmək qabiliyyəti yaşındadır. Bunlardan 32.4 faizi yetkinlik yaşına çatmayanlar, 9.4 faizi pensiyaçılardır.
Nazirlikdən birliriblər ki, 2023-cü ildən qandas statusunun verilməsi Qazaxıstan səfirlikləri vasitəsilə “vahid pəncərə” pilot rejimində həyata keçirilir.
Buna görə də hazırda vətənə səfər, iş yeri, mənzil şəraiti kimi məsələləri Qazaxıstana gəlmədən də həll etmək mümkündür.
Ümumilikdə 1991-ci ildən bəri rəsmi məlumata görə Qazaxıstanda 1 milyon 140 min 700 etnik qazax məskunlaşdırılıb.
ABŞ səfiri Ombudsmanla insan haqlarını müzakirə edib
Azərbaycanın İnsan Hüquqları üzrə Müvəkkili (Ombudsman) Səbinə Əliyeva sentyabrın 25 də Birləşmiş Ştatların (ABŞ) Azərbaycandakı fövqəladə və səlahiyyətli səfiri Mark Libbini qəbul edib.
Ombudsman Aparatının məlumatına görə, görüş zamanı Ombudsman insan hüquq və azadlıqlarının müdafiəsi sahəsində son dövrdə həyata keçirdiyi fəaliyyət barədə qonağa ətraflı məlumat verib.
ABŞ səfirliyi də X platformasında görüş barədə səfir Libbiyə istinadən məlumat yayıb.
"Ombudsman Səbinə Əliyeva ilə insan haqlarını müzakirə etmək üçün görüşməyimə şadam. Biz Azərbaycanı beynəlxalq öhdəliklərinə əməl etməyə çağırırıq", - M.Libbi qeyd edib.
Xatırlatma
Ötən ilin noyabrından başlayaraq Azərbaycanda qruplar halında 20-dən çox jurnalist, ictimai fəal qaçaqmalçılıq və başqa ittihamlarla həbs edilib. Onların hər biri ittihamla razılaşmır, bunu peşə fəaliyyətləri və siyasi sifariş ilə izah edirlər. Yerli hüquq-müdafiə təşkilatlarının hazırladıqları siyahılara görə, hazırda Azərbaycan həbsxanalarında təqribən 300 siyasi məhbus var. Rəsmilər isə, bir qayda olaraq, vurğulayırlar ki, ölkədə heç kim sırf peşə fəaliyyəti ilə bağlı, siyasi əsaslar ilə həbs edilmir.
Trampın qərargahı Zelenski ilə görüş planlaşdırılmadığını deyir
ABŞ-də respublikaçılardan prezidentliyə namizəd, keçmiş prezident Donald Tramp (Donald Trump) bu həftə Birləşmiş Ştatlarda səfərdə olan Ukrayna prezidenti Volodimir Zelenski ilə görüşünün planlaşdırılmadığını deyir. Bu barədə "The Associated Press" Trampın seçki qərargahı təmsilçisinə istinadla xəbər verir.
Ukrayna rəsmiləri isə daha öncə bildirmişdilər ki, Zelenski prezidentliyə hər iki namizəd – Tramp və vitse-prezident, demokratların namizədi Kamala Harris ilə görüşəcək, onlara öz təkliflərini təqdim edəcək. Zelenski söhbətin Ukraynanın Rusiyanın təcavüzkar müharibəsində qələbə planından getdiyini deyib.
Son günlər Tramp bir neçə bəyanatla Ukraynanın müharibədə qələbəsinin mümkünlüyünü, hazırkı administrasiyanın Kiyevə yardımını davam etdirməyin vacibliyini şübhə altına alıb. O vəd edib ki, ABŞ-də seçkini udarsa, müharibədən çıxacaqlar, çünki sülhü razılaşdıra biləcək. Tramp həmçinin Rusiya üzərində qələbə çalmağın mümkünlüyünə şübhəsini bildirərək deyib ki, onun fikrincə, Rusiya yaxşı savaşa bilir, daha öncə Hitleri və Napoleonu məğlub edib.
Tramp daha öncə belə bir fikir irəli sürüb ki, Zelenski ABŞ seçkisində K.Harrisin qalib gəlməsini istəyir, Ukrayna prezidentini "dünyanın ən yaxşı taciri" kimi təsvir edib.
Zelenskinin mövqeyi
Zelenski Trampın son açıqlamalarını şərh etməsə də, daha öncə keçmiş prezidentin müharibəni 24 saat içində bitirməyin mümkünlüyü barədə dediyinə şübhə ilə yanaşıb. O, respublikaçıların ABŞ-nin vitse-prezidenti postuna namizədi Ceyms Devid Vensi (JD Vance) də tənqid edib, Ukraynanın sülh qarşılığında ərazisinin bir hissəsindən imtina etməsi ideyası ilə razılaşmadığını deyib.
Prezident Co Bayden (Joe Biden) və vitse-prezident Harris isə sentyabrın 26-da Ağ evdə Zelenski ilə görüşməlidirlər. Ukrayna prezidenti onlara "qələbə planı"nı təqdim edəcəyini deyib. ABŞ rəhbərliyinin bu plana necə yanaşacağı bəlli deyil. Medianın yazdığına görə, planda Ukraynanın NATO-ya dəvət olunması, Ukraynaya Rusiyanın dərinliklərini Qərbin verdiyi uzaqvuran silahlarla vurmaq məsələləri salınıb.
Bayden BMT Baş Assambleyasında çıxışında deyib ki, ABŞ Ukraynanın qələbə çalması, ədalətli sülh əldə etməsi üçün ona dəstəyi davam etdirəcək.
Azərbaycanda karantin gələn ilə qədər uzadılıb
Azərbaycanda xüsusi karantin rejiminin müddəti yenə uzadılıb.
Baş nazir Əli Əsədov bununla bağlı qərar imzalayıb.
"Koronavirus (COVID-19) infeksiyasının ölkə ərazisində yayılmasının, onun törədə biləcəyi fəsadların qarşısının alınması məqsədilə Azərbaycan ərazisində xüsusi karantin rejiminin müddəti 2025-ci il 1 yanvar saat 06:00-dək uzadılsın", - qərarda yazılıb.
Bundan əvvəl xüsusi karantin rejimi oktyabrın 1-nə kimi uzadılmışdı.
Azərbaycanda koronavirus pandemiyası ilə bağlı 2020-ci ilin martından karantin rejimidir. Yoluxma sayından asılı olaraq rejim arada sərtləşdirilsə də, sonra yenə yumşaldılıb. Onun müddəti dəfələrlə uzadılıb.
Bu karantin çərçivəsində Azərbaycanın quru sərhədində xarici ölkələrə gediş-gəlişdə hələ də məhdudlaşdırmalar saxlanıb. Bəzi müxalifət partiyalarının rəhbərləri pandemiyanın başa çatmasına baxmayaraq, bəzi məhdudiyyətin saxlanmasını hakimiyyətin siyasi, iqtisadi maraqları ilə izah edir.
Prezident İlham Əliyev isə bu həftə Milli Məclisdə çıxışında bu məsələni təhlükəsizlik amili ilə izah etdi: "Mən tam əminliklə deyə bilərəm ki, son illər ərzində quru sərhədlərimizin bağlı olması bizi çox böyük fəlakətlərdən xilas etdi. Hətta bu gün - sərhədlər bağlı olan vaxtda təhlükəli hərəkətlər aparılır və bu hərəkətlərin qarşısı alınır".
Xatırlatma
2019-cu ilin sonlarında dünyada yeni koronavirus aşkar edilib. 2020-ci il martın 11-də Ümumdünya Səhiyyə Təşkilatı (ÜST) koronavirusu pandemiya elan edib. Dünyada sürətlə yayılan bu virusdan 7 milyon civarında şəxsin vəfat etdiyi bildirilir. Azərbaycanda isə indiyə kimi 830 mindən çox şəxsin bu virusa yoluxduğu, onlardan 10 min 400-nün vəfat etdiyi bildirilir. Amma son illər bu virusa yoluxmanın kəskin şəkildə azaldığı vurğulanır.
ÜST ötən il mayın 5-də koronavirus pandemiyasının başa çatdığını açıqlayıb.
Pezeşkian deyir ki, Tehran nüvə qarşıdurmasını bitirmək üçün əməkdaşlığa hazırdır
İran prezidenti Məsud Pezeşkian BMT-nin Baş Assambleyasındakı çıxışında deyib ki, İran Qərblə nüvə qarşıdurmasını bitirməyə hazırdır. O, Ukrayna və Yaxın Şərqdəki müharibələrə dialoq yoluyla son qoymağa çağırıb.
"Birgə Hərtərəfli Fəaliyyət Planının (BHFP) öhdəlikləri tam şəkildə və xoş məramla icra olunarsa, biz bu planın iştirakçıları ilə işləməyə hazırıq. Digər məsələlərlə bağlı dialoq davam edə bilər", – Pezeşkian sentyabrın 24-də illik toplantıdakı ilk çıxışında deyib.
Pezeşkian prezident İbrahim Rəisi mayda vertolyot qəzasında həlak olandan sonra prezident seçilib, iyulda prezident andı içib. Pezeşkian daha öncə demişdi ki, Tehran 2015-ci ildə imzalanmış nüvə sazişini yenidən işə salmaq üçün Birləşmiş Ştatlar ilə danışıqlara hazırdır.
Nüvə sazişinin taleyi
Prezident Donald Tramp (Donald Trump) 2018-ci ildə Birləşmiş Ştatları birtərəfli şəkildə sazişdən çıxarıb, Tehrana ağır maliyyə sanksiyaları tətbiq edib.
Sazişə Çin, Fransa, Rusiya, Böyük Britaniya, Almaniya və Avropa İttifaqı da imza atmışdı.
Prezident Co Bayden (Joe Biden) nüvə sazişinə yenidən təkan vermək istəsə də, Vaşinqton və Tehran şərtləri razılaşdıra bilməyiblər.
Pezeşkian onu da deyib ki, İran sanksiyaların yüngülləşdiriləcəyinə ümid edir. O, sanksiyaları "ölkəmizin iqtisadiyyatına zərbə vurmağı hədəfləyən dağıdıcı və qeyri-insani silahlar" adlandırıb.
ABŞ və Aİ-nin terrorçu saydığı HƏMAS silahlı qruplaşması ötən ilin oktyabrında İsrailə hücum edəndən bəri İranla Qərbin münasibətləri pisləşib. Tehran həmçinin Rusiyanın Ukraynadakı təcavüzkar müharibəsinə dəstəyini artırıb.
Ancaq Pezeşkian BMT-dəki çıxışında deyib ki, "İran hamı üçün sülh istəyir, heç kəslə müharibə, yaxud mübahisə istəmir". O, Ukraynadakı müharibənin başa çatmasının vacibliyini də vurğulayıb.
"Biz bütün dinc həlləri dəstəkləyir və inanırıq ki, dialoq bu böhranı həll etməyin yeganə yoludur", – o bildirib.
Qəzzada atəşkəs çağırışı
Pezeşkian İsrailin Qəzzada apardığı hərbi əməliyyatları da kəskin tənqid edib, onu "soyqırımı" adlandıraraq dərhal dayandırılmasını vacib sayıb.
"Beynəlxalq ictimaiyyətin Qəzzada daimi atəşkəsi təmin etməsi, İsrailin Livandakı ümidsiz barbarlığına regionu və dünyanı bürüməyincə son qoyması vacibdir", – o vurğulayıb.
Pezeşkian bundan öncə xəbərdarlıq edib ki, İsrailin öz ərazisinə Livanın cənubundan "Hizbullah"ın hücumlarına cavab olaraq hava kampaniyası regional müharibəyə çevrilə bilər. Birləşmiş Ştatlar "Hizbullah"ı terrorçu təşkilat sayır.
İran uzun müddət "Hizbullah"ın əsas sponsoru olub.
Ərdoğanla Paşinyan Nyu-Yorkda görüşüblər
Türkiyə prezidenti Rəcəb Tayyib Ərdoğan Türkiyə-Ermənistan münasibətlərində normallaşmanı Ermənistanla Azərbaycan arasında sülh sazişinin imzalanmasına bağlayır. Bunu o, sentyabrın 24-də Nyu-Yorkda Ermənistanın baş naziri Nikol Paşinyanla görüşündə bir daha dilə gətirib.
Hər iki lider BMT Baş Assambleyasının iclasına qatılandan sonra Nyu-Yorkdakı Türk Evində bir araya gəliblər. Onların ikitərəfli əlaqələrin normallaşdırılması, eləcə də Ermənistan-Azərbaycan danışıqlar prosesi yönündə səyləri müzakirə etdiyi bildirilir.
Ermənistan tərəfinin yaydığı rəsmi məlumata görə, liderlər Ankara və Yerevanın 2022-ci ildən bəri əldə etdiyi anlaşmaları "detallı" nəzərdən keçirib, normallaşma prosesinə "yeni təkan" verməyə razılaşıblar.
"Azərbaycan-Ermənistan sülh prosesində əldə edilənlərin Türkiyə-Ermənistan normallaşma prosesinə də müsbət təsiri olacaq", – Ərdoğan daha öncə BMT Baş Assambleyasındakı çıxışında deyib.
Ankara on illərdir Türkiyə-Ermənistan sərhədinin açılmasını, Yerevanla diplomatik əlaqələrin qurulmasını Ermənistan-Azərbaycan münaqişəsinin Bakı üçün məqbul həlli ilə şərtləndirir. 2022-ci ilin əvvəlində Ermənistan hökuməti ilə normallaşma danışıqları başlayandan Türkiyə liderləri bu şərti səsləndirib.
"Zəngəzur dəhlizi"
Ərdoğan bu ilin iyulunda bir daha deyib ki, Ermənistan-Azərbaycan sülh sazişində Ermənistan ərazisindən Azərbaycanın Naxçıvan eksklavına quru dəhliz məsələsi salınmalıdır. Türkiyə Milli Kəşfiyyat Təşkilatının (MİT) başçısı İbrahim Kalın da Bakıya son səfəri zamanı həmin bəyanatı dilə gətirib. Kalın da Ərdoğanın Paşinyanla danışıqlarında iştirak edib.
Rəsmi Bakının "Zəngəzur dəhlizi" dediyi həmin marşrut 2020-ci ilin üçtərəfli atəşkəs bəyanatında nəzərdə tutulub. Yerevan öz ərazisindən heç bir ölkəyə dəhliz verməyəcəyini deyir. Bu ilin yayında Bakı sözügedən maddənin sülh sazişi layihəsindən çıxarıldığını açıqlayıb.
Ermənistan hökumətinin mövqeyi belədir ki, Naxçıvanla Azərbaycanın qalan hissəsi arasında daşımalara Ermənistan nəzarət etməlidir. Paşinyanın mətbuat xidmətinin məlumatına görə, Türkiyə liderinə Yerevanın bu məsələdə mövqeyi barədə məlumat verilib.
Bakı və Ankaranın tələb etdiyi dəhliz Ermənistanın İranla həmsərhəd Sünik vilayətindən keçməlidir. Tehran dəfələrlə onu Ermənistanla ümumi sərhəd və nəqliyyat əlaqələrindən məhrum etmək səylərinə qarşı xəbərdarlıq edib.
Azərbaycan 2020-ci il 44 günlük müharibə və 2023-cü ildə birgünlük əməliyyatlarla ərazi bütövlüyünü bərpa edib. Ancaq Ermənistanla sülh sazişi imzalanmayıb, sərhədlər delimitasiya olunmayıb.
Çeçenistanda saxlanan Azərbaycan vətəndaşları ölkəyə gətirilib
Çeçenistanda saxlanan Azərbaycan vətəndaşları ölkəyə gətirilib.
Bu barədə bu gün, sentyabrın 24-də Azərbaycan Xarici İşlər Nazirliyi (XİN) məlumat yayıb.
Təqribən bir ay bundan əvvəl Rusiyanın Çeçenistan Respublikasında üç nəfər Azərbaycan vətəndaşı - Elxan Şirinov, Vüqar Məhərrəmov və Nihad Rzayevin miqrasiya qanunlarını pozmaları ittihamı ilə saxlandıqları bildirilirdi. Daha sonra E.Şirinov və V.Məhərrəmovun Qroznıda Ukraynada müharibəyə göndərilmək məqsədilə təlimlərə cəlb olunduqları vurğulanırdı.
Azərbaycan XİN-dən vurğulanıb ki, həmin şəxslərin ölkəyə geri qaytarılması məqsədilə Rusiya XİN-nə nota ünvanlanıb və aidiyyəti qurumlar ilə danışıqlar aparılıb: "Bununla yanaşı, saxlanılmış vətəndaşlarımız ilə səfirliyimiz tərəfindən telefon danışığı baş tutub. Vətəndaşlarımızın... 21 sentyabr tarixində Rusiya Federasiyası ilə dövlət sərhəd keçid məntəqəsindən quru yolla Azərbaycana qayıdışı təmin edilib".
Hələlik, məsələ ilə bağlı həmin şəxslər və Rusiya tərəfi ilə danışmaq mümkün olmayıb.
Yeri gəlmişkən, Rusiya prezidenti Vladimir Putin 2024-cü ilin avqustunda Rusiya vətəndaşlığı almış şəxslərin icbari qaydada hərbi qeydiyyata düşməsinə dair qanun imzalayıb.
Bu tələbin yerinə yetirilməməsi Rusiya vətəndaşlığından məhrum edilmə ilə nəticələnə bilər.
Xatırlatma
2022-ci ilin fevralın 24-də Rusiya Ukraynaya təcavüz edib. Bundan sonra Qərb ölkələri Rusiyaya qarşı sanksiyaları genişləndirib. (sanksiyalar 2014-cü ildə Rusiyanın Ukraynanin Krım bölgəsini ilhaq etməsindən sonra başlamışdı) Azərbaycan sanksiyalara qoşulmur. Artıq 2 il yarımdır davam edən müharibədə yüz minlərlə insanın həlak olduğu, milyonlarla insanın qaçqın düşdüyü bildirilir.
Rusofobiyaya görə cəza Rusiya Cinayət Məcəlləsinə salınacaq
Rusiya hakimiyyəti ölkənin Cinayət Məcəlləsinə rusofobiyaya görə cəzanı daxil edəcək. "Rusofobiya" xaricdə rusiyalı vətəndaşlara və Rusiya Federasiyası rezidentlərinə qarşı əcnəbilər və xarici məmurlar tərəfindən diskriminasiyanı, yaxud belə hərəkətlərə çağırışları ehtiva edir.
"Interfax" xəbər agentliyi sentyabrın 23-də yazıb ki, bir qrup deputatın hazırladığı qanun layihəsini təsdiqləyən sənədi əldə edib. Bu layihədə deyilir ki, rusofobiyada ittiham olunanlar qiyabi mühakimə oluna bilərlər.
Cəzası nə olacaq
Hökumət layihəni təsdiqləsə də, rusofobiyada təqsirli bilinənlər üçün cəzaya yenidən baxılmalı olduğunu bildirib.
Qanun layihəsinə görə, rusofobiyaya görə cəza təqsirli bilinənlərin müəyyən postları tutmasını, Rusiyada müəyyən fəaliyyətlə məşğul olmasını yasaqlamalıdır.
Ancaq hökumətin mövqeyi belədir ki, belə bir cəzanın mənası yoxdur, çünki Rusiyadan kənarda yaşayanlara təsiri olmayacaq.
Cinayət Məcəlləsinə əlavə olunacaq maddə yalnız xaricdə rusofobiya halları üçün cəzaları nəzərdə tutacaq. Sənəddə rusiyalı vətəndaşlar və Rusiya Federasiyasının rezidentlərinə qarşı nəyin diskriminasiya sayıldığını detallı göstərilmir.
Rusofobiya Ukrayna müharibəsi fonunda
Son illər, xüsusilə Rusiya 2022-ci ilin fevralında Ukraynanın tammiqyaslı işğalına başlayandan Moskva Qərb rəsmilərini rusofobiyada ittiham edib.
Prezident Vladimir Putin Qərbdə "rus mədəniyyətinin ləğvi"ndən açıq şəkildə danışıb.
Rusiya Xarici İşlər Nazirliyi Qərbin Rusiya rəsmilərinə, qurumlarına qarşı sanksiyalarını "rusofobiyanın ifadəsi" adlandırıb. Sanksiyalar Moskvanın Ukraynaya qarşı tammiqyaslı təcavüzündən sonra qoyulub.
Rusofobiya terminini ilk dəfə 19-cu əsrdə rusiyalı şair və diplomat Fyodor Tyutçev qərbpərəst rusiyalı liberallar barədə işlədib.
Yel Universitetində tarix professoru Timoti Snayder 2023-cü ilin martında BMT-nin Təhlükəsizlik Şurasında təqdimatında deyib ki, müasir Rusiya rusofobiyadan silahlı qüvvələrinin Ukraynada şübhəli hərbi cinayətlərini əsaslandırmaq üçün alət kimi istifadə edir.
İran kömür mədəni partlayışında 38 nəfərin öldüyünü bildirir, 14 nəfər itkin düşüb
Sentyabrın 23-də İran hakimiyyəti kömür mədəni partlayışında 38 nəfərin həlak olduğunu, 14 nəfərin mədəndə qaldığını açıqlayıb.
Bir gün öncə isə 51 nəfərin öldüyü açıqlanmışdı. İran dövlət televiziyası sentyabrın 21-də Təbəsdə mədən partlayışına metan qazı sızmasının səbəb olduğunu bildirib.
Dağıntılar altında qalanların xilas edilməsi işləri çətin gedir, çünki mədəndə metan qazının səviyyəsi yüksək olaraq qalır. Bunu Təbəsin yerləşdiyi Cənubi Xorasan vilayətinin qubernatoru Cavad Qənaət deyib.
Daxili işlər naziri İskəndər Mömini sentyabrın 22-də bildirib ki, xilasedicilər mədəndə qalanlardan 400 metr aralıdadır.
İnsidentlə bağlı araşdırma başladılıb, amma hələlik, həbs edilən yoxdur. Vilayət prokuroru deyib ki, rəsmi orqanlar partlayışın səbəbini daha yaxşı anlamaq üçün ekspert rəyini gözləyirlər.
Cənubi Xorasanda üçgünlük matəm elan edilib.
+++
Bu, İranın mədən sənayesində ilk partlayış deyil.
Ötən il şimaldakı Damğan şəhərində mədən partlayışında altı nəfər həlak olub.
2021-ci ilin mayında isə həmin ərazidə uçqunda iki mədənçi ölüb.
2017-ci ildə İranın şimalında Azadşəhr şəhərində partlayışda 43 şaxtaçı həlak olub.
Adətən, qəzalara təhlükəsizlik standartlarında boşluqlar, fövqəladə xidmətlərin qeyri-adekvatlığı səbəb göstərilir.
Sentyabrın 25-dən Bakı-Sumqayıt qatarlarının tarifləri artırılır
Sentyabrın 25-dən Abşeron dairəvi marşrutu üzrə (Bakı-Sumqayıt) qatarlarının tarifləri artırılır
Bu barədə Azərbaycan Dəmir Yolları (ADY) Qapalı Səhmdar Cəmiyyəti (QSC) məlumat yayıb.
Bildirilib ki, Abşeron dairəvi marşrutu üzrə qiymət minimum 40 qəpik olacaq:
"Bu da ölkədə ictimai nəqliyyat növləri arasında ən aşağı tarifdir. Ümumilikdə Abşeron dairəvi marşrutu üzrə gediş haqları məsafədən asılı olaraq 10-20 qəpik artırılacaq".
Qurumdan vurğulanıb ki, bu yeniliklər beynəlxalq standartlara uyğun şəkildə həyata keçirilir və keyfiyyətin artımına yönəlib.
ADY-dən əlavə olunub ki, ölkədaxili səfərlər edən sərnişinlər üçün qiymət endirimləri da nəzərdə tutulub:
"Biz 1 noyabr tarixindən ölkədaxili marşrutlar üzrə dinamik qiymət siyasətinə keçirik. Səfərə 25-30 gün qalmış və əks istiqamətdə oturacağa bilet almış sərnişinlər 15 faiz endirimdən yararlana biləcəklər".
Bu qiymət artımı ilə bağlı Azadlıq Radiosuna danışan bəzi Sumqayit və Abşeron rayon sakinləri narazılıqlarını ifadə ediblər.
Onlar bu qiymət artımının keyfiyyətin yüksəlməsinə xidmət edəcəyinə bir elə də inanmadıqlarını vurğulayıblar.
Həmin şəxslərin sözlərinə görə, ölkədə nəqliyyatda hər qiymət artımı baş verəndə keyfiyyətin də yüksəldiləcəyi deyiləsə də, çox vaxt vədlər özünü doğurultmur.
Xatırlatma
Bakı-Sumqayıt qatarı hələ sovet dövründən fəaliyyət göstərib. 2015-ci ildən etibarən isə Bakı-Sumqayıt-Bakı dairəvi dəmir yolu iki hissəyə bölünüb.
Onda Bakı-Sumqayıt istiqamətində dəmir yolu infrastrukturu yenidən qurulmağa başlanıb. Həmin vaxt xəttə yeni, müasir qatarlar buraxılıb.
Abşeron dairəvi dəmir yolu Bakı, Sumqayıt şəhərləri və Abşeron yarımadasında yaşayan əhalinin gediş-gəlişini təşkil edən elektrikli dəmiryolu xəttidir. Bu dəmiryolu xətti 2 hissədən ibarətdir: Bakı- Biləcəri- Sumqayıt və Bakı- Sabunçu-Sumqayıt.
Rusiyanın Sarmat qitələrarası raketinin atışı bu dəfə də uğursuz olub?
Yeni peyk fotolarında Rusiyada, ekspertlərin qənaətinə görə, qitələrarası ballistik raketin uğursuz sınaq atışı nəticəsində yaranmış böyük krater görünür.
Sentyabrın 21-də çəkilmiş fotolarda Arxangelsk vilayətindəki Plesetsk Kosmodromunda habelə dörd yanğınsöndürən maşını da görmək mümkündür.
Açıq mənbələrin təhlili üzrə @MeNMyRC1 adı ilə tanınan ekspert fotoları öyrəndikdən sonra bu nəticəyə gəlib ki, krater RS 28 Sarmat qitələrarası ballistik raketinin partlaması nəticəsində yaranıb. Bu o deməkdir ki, raket havaya qalxmadan elə şaxtada partlaya bilərdi. Başqa ekspertlər də onun bu qənaəti ilə razılaşıblar.
Əgər təhlil doğrudursa, söhbət Sarmat raketinin sayca 4-cü uğursuz startından gedir.
Rusiya 2022-ci ildə bu tip raketi uğurla sınaqdan çıxardığını xəbər vermişdi.
Tikintisi 2000-ci illərdə başlanmış Sarmat maye yanacaqla işləyir və 18 min kilometr məsafəni qət edə bilir.
İddia olunduğuna görə uzunluğu 35 metr olan raket 10 ton ağırlığında müxtəlifb döyüş başlıqları daşıya bilər.
Prezident: 'Quru sərhədlərimizin bağlı olması bizi çox böyük fəlakətlərdən xilas etdi'
"Mən tam əminliklə deyə bilərəm ki, son illər ərzində quru sərhədlərimizin bağlı olması bizi çox böyük fəlakətlərdən xilas etdi. Hətta bu gün - sərhədlər bağlı olan vaxtda təhlükəli hərəkətlər aparılır və bu hərəkətlərin qarşısı alınır". AZƏRTAC-ın xəbərinə görə, bunu sentyabrın 23-də prezident İlham Əliyev VII çağırış Milli Məclisin ilk iclasındakı çıxışında deyib.
Amma dövlət başçısı bildirib ki, Azərbaycanda daxili risklər yoxdur. "Azərbaycanda təhlükəsizlik, əmin-amanlıq uzun illərdir təmin edilir, sabitlik bütün dünya üçün nümunə ola bilər. Hər kəs bilir ki, əgər sabitlik olmasa, heç bir ölkə inkişaf edə bilməz. Bu gün sabitliyi pozulan ölkələrin vəziyyətini və aqibətini hər kəs yaxşı görür. Bu, təhlükəsizliyin, inkişafın, xarici sərmayənin cəlb edilməsi üçün başlıca şərtdir", - prezident diqqətə çatdırıb.
Xatırlatma
Azərbaycanın qonşu ölkələrlə quru sərhədlərində gediş-gəliş 2020-ci ilin əvvəllərindən məhdudlaşdırılıb. Həmin vaxt bu, koronovirus pandemiyası ilə izah edilib.
2022-ci il mayın 5-də Ümumdünya Səhiyyə Təşkilatı koronovirus pandemiyasının sona çatdığını açıqlayıb. Amma Azərbaycanın quru sərhədlərində məhdudiyyətlər qalır. Rəsmilər indi də bunu təhlükəsizlik amili ilə izah edirlər. Amma bu hal zaman-zaman ölkə vətəndaşlarının, xüsusilə də müxalifətçi fəalların etirazlarına səbəb olur. Müxalif düşərgədə hesab edirlər ki, hakimiyyət bununla daha çox iqtisadi məqsədlər güdür. Onların fikrincə, Azərbaycan vətəndaşları qonşu ölkələrə quru sərhədlərlə alış-verişə gedə bilmədiklərindən bu, ölkədən daha çox valyuta çıxarılmasının qarşısını alır. Üstəlik, onlar deyir ki, son illər ölkədə təyyarə biletləri də kəskin artmaqla haqsız qazancların əldə edilməsinə imkanlar yaranıb. Müxalif düşərgədə habelə vurğulayırlar ki, bununla Azərbaycan xalqı siyasi baxımdan da məhdudiyyətlərə öyrəşdirilir.
Azərbaycanın AİHM qərarlarını necə icra etməsinə baxılıb
Sentyabrın 20-də Avropa Şurasının Nazirlər Komitəsi (AŞNK) Avropa İnsan Hüquqları Məhkəməsinin (AİHM) Azərbaycana qarşı bəzi qərarlarının necə icra edilməsini nəzərdən keçirib.
AİHM Avropa İnsan Hüquqları Konvensiyasının pozuntuları üzrə qərarlar çıxarır. Məhkəmənin qərarlarının necə icra olunmasına AŞNK nəzarət edir.
Defamasiyaya görə həbsin ləğvi üçün çağırış
"Mahmudov və Ağazadə Azərbaycana qarşı" işi ərizəçi jurnalistlərin ifadə azadlığının pozulmasından idi. Həmçinin yerli məhkəmələrin ifadə azadlığına müdaxiləni yetərincə əsaslandırmaması, qeyri-proporsional kriminal sanksiyaların tətbiqi, özəlliklə defamasiyaya görə həbs cəzaları mübahisələndirilmişdi.
Azərbaycan hakimiyyətinin təqdim etdiyi məlumatlarda bildirilir ki, yerli məhkəmələr defamasiyaya görə həbsdən, əsasən, istifadə etmirlər. Amma müzakirələrdə narahatlıqla qeyd edilir ki, bəzi hallarda həbs cəzasına kriminal sanksiya kimi əl atılır.
Yerli qanunvericiliyin Avropa İnsan Hüquqları Konvensiyasının 10-cu (ifadə azadlığı) maddəsinin tələblərinə uyğunlaşdırılmaması təəssüflə vurğulanır. Bunun üçün Cinayət Məcəlləsinin 147 və 148-ci maddələrinin sanksiyasında uzunmüddətli həbs cəzalarının çıxarılması istənilir. Nazirlər Komitəsi dəfələrlə bu məsələ ilə bağlı çağırış edib.
Yeri gəlmişkən, sentyabrın 19-da AXCP sədri Əli Kərimlinin Cinayət Məcəlləsinin 147.1-ci (böhtan) maddəsi ilə mühakiməsi başlanıb. Partiyadan xaric edilmiş Aydın Əliyev onun həbsini istəyir. Həmin maddədə 500 manatadək cərimə, 240 saatdan 480 saatadək ictimai işlər, 1 ilədək islah işləri və ya 6 ayadək həbs cəzası nəzərdə tutulub.
"Məmmədli qrupu Azərbaycana qarşı"
"Məmmədli qrupu Azərbaycana qarşı" işində AİHM hər bir ərizəçinin Konvensiyanın 18-ci (Hüquqlarla bağlı məhdudiyyətlərdən istifadənin hədləri) maddəsinə zidd olaraq hüququnun pozulması qərarına gəlmişdi. Bu isə hökumətin tənqidçilərinin, vətəndaş cəmiyyəti fəallarının, insan haqları müdafiəçilərinin özbaşına həbs olunması tendensiyasını ortaya qoyurdu. AŞNK Azərbaycan hakimiyyətini qalan yeddi ərizəçiyə qarşı hökmləri dərhal ləğv etməyə, onların kriminal tarixçəsini təmizləməyə çağırır.
Komitə bu işlərin təkrar baxılmaq üçün Ali Məhkəməyə göndərilməsinin həddən artıq və izahsız yubanmasından narahatlıq bildirib.
Hazırda hüquq müdafiəçisi Anar Məmmədli qaçaqmalçılıq ittihamı ilə həbsdədir. O və ötən ilin noyabrından bəri oxşar ittihamla saxlanmış 20-yədək jurnalist, media işçisi ittihamı saxta adlandırır, peşə fəaliyyətinə görə saxlandıqlarını deyirlər.
"Sarqsyan Azərbaycana qarşı" işinə dekabrda təkrar baxılacaq
AŞNK "Sarqsyan Azərbaycana qarşı" işini də nəzərdən keçirib. Bu iş 1992-94-cü il Qarabağ müharibəsi zamanı evini tərk etməli olmuş ermənistanlı qaçqının mülkiyyət hüquqları barədədir. AİHM-nin 2017-ci ildə çıxardığı qərarda deyilirdi ki, Azərbaycan bu ərizəçinin qohumuna üç ay ərzində müəyyən maddi və mənəvi ziyana görə kompensasiya ödəməlidir. Azərbaycan hakimiyyəti isə katibliyin hazırladığı Anlaşma Memorandumunun mümkün təsirlərini dəyərləndirməkdən, Avropa Şurasının bank hesabı vasitəsilə ödənişi etməkdən ötrü daha çox zamana ehtiyacı olduğunu bildirib.
Nazirlər Komitəsi qeyd edir ki, cavabdeh ölkələr AİHM-nin bütün qərarlarını tam və səmərəli icra etməlidir. Bu, məhkəmənin kəsdiyi kompensasiyanın qeyd-şərtsiz ödənməsinə aiddir. Komitə Azərbaycan hakimiyyətini birbaşa Sarqsyanın qohumuna kompensasiyanın ödənməsini həyata keçirməyə çağırıb. Bu işə 2024-cü ilin dekabrında komitənin iclasında yenidən baxılacaq.
Nazirlər Komitəsi bundan öncə "Çıraqov və digərləri Ermənistana qarşı" işi üzrə qərar çıxarıb. Bu qərar 1992-94-cü illər Qarabağ müharibəsi dövründə evlərini tərk etməli olmuş altı azərbaycanlının mülkiyyət hüquqları ilə bağlı idi.
Xatırlatma
Azərbaycan 2020-ci ildə 44 günlük müharibə, 2023-cü ildə birgünlük hərbi əməliyyatla ərazi bütövlüyünü bərpa edib. Tərəflər sülh sazişi imzalamayıb, sərhədlər demarkasiya olunmayıb.
Dağlıq Qarabağ 1988-ci ildə Ermənistanın Azərbaycana ərazi iddiaları ilə başlayıb. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilib. Münaqişə nəticəsində hər iki ölkədə yüz minlərlə insan evini tərk etməli olub.
İnsan ürəyi yemiş rusiyalı killer Ukrayna müharibəsindən evinə qayıdıb
Qətldə, qurbanlarının birinin ürəyini bişirib yeməkdə təqsirli bilinmiş rusiyalı kişi Ukrayna müharibəsindən müvəqqəti olaraq evinə qayıdıb. Bu barədə yerli media yazır.
Dmitri Malışev döyüşdə aldığı yaralardan müalicə olunmaq üçün evə göndərilib. Bunu Volqoqrad vilayətindəki Raxinka kəndinin başçısı Fyodor Kadovba V1.ru saytına deyib.
"Onu dünən mağazada gördüm, salam verdi. Mənə dedi ki, hazırda müalicə olunur, cəbhəyə qayıdacaq", – Kadovba bildirib.
Kadovbanın sözlərinə görə, Malışev bu il ikinci dəfədir müalicə üçün evinə qayıdır. O, Malışevin çənəsində yara, qolunda qəlpə olduğunu söyləyib.
Mütəşəkkil cinayətkar dəstə başçısı olan Malışev üç nəfəri öldürdüyünə görə 2015-ci ildə 25 il həbsə məhkum edilib. Onlardan ikisi yerli biznesmen, biri tacikistanlı olub. Malışev öldürdüyü tacikin ürəyini yeyib.
2022-ci ilin fevralında Ukraynanı işğal etməyə başlayan Rusiya hökuməti əfv qarşılığında minlərlə məhbusa cəbhəyə getmək təklif edəndə Malışev də bundan yararlanıb.
Müharibədən qayıdan onlarla məhbus qətl daxil olmaqla, zorakı cinayətlər törədiblər.
Ursula fon der Leyen Kiyvdə Ukrayna üçün 35 milyard avroluq kredit elan etdi
Avropa İttifaqı Ukraynaya 35 milyard avro məbləğində kredit təqdim edəcək.
Bunu Avropa Komissiyasının hazırda Kiyevdə səfərdə olan prezidenti Ursula fon der Leyen elan edib.
Xəbər verilir ki, bu kredit üçün vəsaitlər Rusiyanın Avropada dondurulmuş aktivlərinin gəliri ilə formalaşdırılacaq.
Ukrayna bu vəsaiti 40 il müddətində qaytarmalıdır.
Kiyevdə prezident Volodimir Zelenski ilə birgə keçirdiyi mətbuat konfransında fon der Leyen deyib ki, bu məbləğdə kreditin ayrılması G7 ölkələri qrupunun Ukraynanı uzunmüddətli dəstəkləmək öhdəliyinin yerinə yetirilməsində növbəti addımdır.
G7 ölkələrinin NATO-nun ötən iyulda Vilnüsdə keçirilən sammitində elan edilmiş yardımına həm hərbi yardımlar, həm də müharibədən sonra ölkənin bərpası üçün ayrılan vəsaitlər daxildir.
Volodimir Zelenski bəyan edib ki, bu vəsait ilk növbədə ölkənin enerji sektorunun dəstəklənməsinə, sığınacaqların və dinc əhalinin qorunması üçün başqa qurğuların tikilməsinə, habelə Ukrayna hərbi sənayesinin inkişafına xərclənəcək.
Zelenski habelə ölkə rəhbərliyinin yeni silah növləri, xüsusilə də hava hücumundan müdafiə sistemləri almaq planlarından söz açıb.
Rusiyanın 200 milyard avrosu
Financial Times qəzeti dəqiqləşdirir ki, Ukraynaya veriləcək kredit Rusiya Mərkəzi Bankının Avropa İttifaqında dondurulmuş aktivlərinin gəlirlərindən formalaşdırlacaq.
Hazırda Avropada Rusiya dövlət strukturlarının 200 milyard avrosu dondurulub.
Bu vəsaitin hamısının müsadirə olunması mexanizmi hələ ki, işlənib hazırlanmayıb.
Bununla belə Aİ dondurulmuş vəsaitlərdən gələn gəlirləri Ukraynanın ehtiyaclarına xərcləyir.
Ursula fon der Leyen 8-ci dəfə Kiyevə gəlib
Avropa Komissiyasının prezidenti Ursula fon der Leyen sentyabrın 20-də Kiyevə gəlib.
Onun burada qarşıdan qışın gəldiyi bir vaxtda Rusiyanın Ukraynanın enerji infrastrukturuna hava zərbələri ilə bağlı Kiyevə davamlı dəstək elan edəcəyi gözlənilir:
"Mənim Kiyevə sayca 8-ci səfərim tezliklə isitmə mövsümünün başlanacağı və Rusiyanın Ukraynanın enerji infrastrukturuna hava zərbələrinin davam etdiyi bir vaxta təsadüf edir”.
Avropa Komissiyasının rəhbəri az sonra prezident Volodimir Zelenski ilə görüşərək Ukraynanın enerji təchizatına dəstək məsələsini müzakirə etməlidir.
Ursula fon der Leyen bildirib ki, görüşün gündəliyinə Ukraynanın qışa hazırlığına Avropa İttifaqının köməyi məsələsi daxildir.
Görüşdə habelə Ukraynaya İttifaqa üzvlük prosesində dəstək verilməsi və G7 qrupunun kreditləri müzakirə olunacaq.
Xanım fon der Leyen bundan bir gün əvvəl Ukraynanın enerji infrastrukturunun bərpası üçün Kiyevə əlavə olaraq 178 milyon dollar yardım elan etmişdi.
Bir həftə bundan əvvəl Beynəlxalq Atom Enerjisi Agentliyi xəbərdarlıq etmişdi ki, qarşıdan gələn qış Ukrayna üçün indiyədək keçilmiş sınaqların ən ağırı ola bilər.
Bu arada Ukraynanın hərbi hava qüvvələri sentyabrın 20-ə keçən gecə Rusiyanın 70 dronundan 61-nin məhv edildiyini bildirib.
Hər hansı dağıntı və ya itkilər barədə məlumat verilməyib.
Məhkəmə ‘Müsəlman Birliyi’nin üzvünə 7 il həbs verib
Bugün, sentyabrın 20-də Bakı Ağır Cinayətlər Məhkəməsində "Müsəlman Birliyi" Hərəkatının İdarə Heyətinin üzvü Ağəli Yəhyayevə 7 il həbs cəzası verilib. O, külli miqdarda narkotik maddənin qanunsuz dövriyyəsində ittiham olunur.
Fəalın yaxınlarının verdiyi məlumata görə, Yəhyayev ittihamları rədd edərək işi uydurma adlandırıb, amma məhkəmə onun sözlərini nəzərə almayıb.
Müdafiə tərəfi hökmdən Apellyasiya Məhkəməsinə şikayət verəcəklərini bildiriblər.
Yəhyayev 2023-cü avqustun 31-də saxlanıb. Növbəti gün ona qarşı Cinayət Məcəlləsinin 234.4.3-cü maddəsi ilə (külli miqdarda narkotik maddənin qanunsuz dövriyyəsi) ittiham irəli sürülüb. Məhkəmənin qərarı ilə barəsində həbs qətimkan tədbiri seçilib.
Ağəli Yəhyaev əvvəllər iki dəfə, o cümlədən 2015-ci il Nardaran hadisələri ilə bağlı cinayət təqibinə məruz qalıb.
O, hüquq müdafiəçilərinin siyasi məhbus siyahılarında yer alıb.
Amma rəsmilər Azərbaycanda siyasi məhbusların olması ilə bağlı açıqlamaları qəbul etmirlər.
Xatırlatma
2015-ci il noyabrın 26-da güc orqanları Bakının Nardaran qəsəbəsində xüsusi əməliyyat keçirmişdi. Əməliyyat zamanı ikisi polis olmaqla, altı nəfər həlak olmuşdu.
Həmin gün «Müsəlman Birliyi» Hərəkatının sədri Taleh Bağırov və onun bir qrup tərəfdarı həbs edilib. Sonradan güc strukturları ümumilikdə 70 nəfərin həbs edildiyini bildirib.
Onların bir qisminə qanunsuz silah saxlama və iğtişaş salma ittihamı ilə 1 il 6 aydan 6 il 6 aya kimi həbs cəzası kəsilib.40 nəfərdən çox adama isə daha ağır maddələrlə (dövlət çevrilişinə cəhd, terrorçuluq və s.) ittihamlar verilib.
Onların işi üç qrupa ayrılıb və Bakı Ağır Cinayətlər Məhkəməsində baxılıb. Onlara maksimum 20 il olmaqla ( A.Yəhyayev 15 il həbs almışdı) müxtəlif müddətə həbslər verilsə də məhkəmələrdə günahsız olduqlarını açıqlayıblar.
Onlar polislərin də ölümündə əllərinin olmadığını vurğulayıblar. Həmin şəxslərin bir çoxu (Ağəli Yəhyayev daxil) əfv sərəncamı ilə vaxtından əvvəl azadlığa buraxılıb.
Rusiyada qanunsuz miqrantların uşaqları məktəbə buraxılmayacaq
Rusiyada qanunsuz miqrantların hüquqları əhəmiyyətli dərəcədə məhdudlaşdırılacaq. Bu barədə "Kommersant"a Daxili İşlər Nazirliyi (DİN) rəisinin birinci müavini Aleksandr Qorovoy məlumat verib.
İndi hakimiyyət Rusiyada qeyri-qanuni qalan əcnəbilərin reyestrini yaradır. Həmin sistemə düşdükdən sonra miqrantlar nəqliyyat vasitələri sürə, bank xidmətlərindən istifadə edə, əmlakı qeydiyyata ala, nikah bağlaya və ya poza bilməyəcəklər.
Qorovoy qeyd edib ki, "maraqlanan idarələr" və deputatlar miqrasiya sahəsində digər qanunvericilik təşəbbüsləri üzərində də işləyirlər.
Qorovoyun sözlərinə görə, hazırda Rusiyada 739 minə yaxın və ya miqrantların ümumi sayının 9 faizi qədər qanunsuz miqrant var. Bunlar, əsasən, Özbəkistan, Tacikistan, Qırğızıstan, Ermənistan və Azərbaycan vətəndaşlarıdır.
DİN rəsmisi 2022-ci ilə qədər qeyri-qanuni miqrantların xüsusi çəkisinin 30 faizdən çox olduğunu vurğulayıb. O, indiki azalmanı "Daxili İşlər Nazirliyinin bütün səviyyələrdə hakimiyyət orqanları ilə birgə fəaliyyətinin yaxşı nəticəsi" adlandırıb.
Qorovoy həmçinin bildirib ki, bu ilin birinci yarısında miqrantların Rusiyadan çıxarılması ilə bağlı 100 minə yaxın qərar qəbul edilib. Bu, ötən ilin eyni dövrü ilə müqayisədə 50 faiz çoxdur.
Xatırlatma
Bu ilin martında "Crocus City Hall" konsert zalında 145 nəfərin ölümü və 550-dən çox insanın yaralanması ilə nəticələnən terror aktından sonra Rusiyada miqrantlara qarşı ksenofobiya hissləri kəskinləşib. Hüquq-mühafizə orqanları xaricilərin evlərində və iş yerlərində reydlər keçirir.
İqtisadçıların fikrincə, Rusiyaya son 10 ildə ən aşağı səviyyəyə düşən miqrant axını ölkədə kadr böhranını ciddi şəkildə gərginləşdirə bilər.
Dövlət Suverenliyi Günü təsis edilib
Azərbaycanda Dövlət Suverenliyi Günü təsis edilib.
Bununla bağlı bu gün, sentyabrın 19-da prezident İlham Əliyev sərəncam imzalayıb.
Sərəncamda bildirilir ki, hər il sentyabrın 20-si Azərbaycanda Dövlət Suverenliyi Günü kimi qeyd edilsin.
Sənəddə vurğulanır ki, 2020-ci ildə 44 günlük savaşda Azərbaycan ərazi bütövlüyünü bərpa edib.
Sərəncamda daha sonra 2023-il sentyabrın 19-da cəmi 23 saat çəkən "antiterror" əməliyyatının keçirildiyi vurğulanır. Sənədə görə, bununla da Azərbaycanın bütün ərazisində suverenliyi bərpa edilib.
Xatırlatma
1990-cı illərin əvvəllərində Qarabağ münaqişəsi Azərbaycan və Ermənistan arasında toqquşmalara səbəb olub. Azərbaycan Qarabağ bölgəsi, ətraf yeddi rayona nəzarəti itirmişdi. Amma 2020-ci ildə 44 günlük müharibə nəticəsində Bakı həmin yeddi rayona, Qarabağın isə bir hissəsinə nəzarəti bərpa edib.
2023-cü il sentyabrın 19-20-də Bakı Qarabağda "lokal antiterror tədbirləri" elan edib. Yerevan bunu "etnik təmizlənmə" kimi dəyərləndirib.
Sentyabrın 20-də Qarabağ separatçıları Bakının şərtlərinə razılaşdıqlarını bildiriblər. Sentyabrın 28-də tanınmayan qurum fəaliyyətini dayandıracağını elan edib.
Daha sonra Qarabağdan Ermənistana əhali köçü başlayıb.
AzadlıqRadiosunu Rusiya hökuməti "arzuolunmaz təşkilat" elan edib
Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.
Ətraflı məlumat üçün bura klikləyin.